Во организација на Министерството за внатрешни работи денеска се одржа работилница во чиј фокус беше Нацрт-методологијата за индикатори за безбедност во сообраќајот на патиштата во државата. На работилницата, која започна со воведно обраќање на началничката на Секторот за сообраќајни работи при МВР, Маја Арсовска Манов учествуваа повеќе претставници од различни засегнати страни и институции.
Документот е развиен од Министерството за внатрешни работи со поддршка од УНДП во рамки на Програмата за поддршка на имплементацијата на Националната развојна стратегија (НРС), која се спроведува во тесна координација со Генералниот секретаријат на Владата.
Методологијата ги опфаќа осумте клучни тематски области критични за унапредување на безбедноста на патиштата: брзина, сигурносни појаси и детски седишта, заштитни шлемови, алкохол и дрога, одвлекување на вниманието, возила, патна инфраструктура и постапување по незгода.
Овие методолошки рамки овозможуваат подобро разбирање на факторите на ризик и креирање поефикасни политики засновани на податоци.
Клучен сегмент на процесот е развивањето на Националната интегрирана база на податоци за безбедност на патиштата, како една од мерките предвидени со Националната развојна стратегија предводена од МВР. Новата геореференцирана ГИС-платформа ќе овозможи:
• унифицирано и стандардизирано собирање податоци,
• интеграција на историски и податоци во реално време,
• поефикасна анализа на трендови, ризици и критични точки,
• подобро планирање и приоритизација на интервенции од страна на институциите,
• зголемена јавна транспарентност и отчетност.
-Учество земаа претставници од сите релевантни институции, невладиниот сектор, бизнис заедницата, академската заедница и домашни експерти. На работилницата се разговараше за тоа како предложените индикатори ќе создадат поцврсти и поефикасни политики засновани на податоци, насочени кон поголема заштита на сите учесници во сообраќајот и намалување на последиците од несреќите. Националната интегрирана база на податоци за безбедност на патиштата (НИБПБП), предводена од МВР и поддржана од УНДП, ќе биде функционална во текот на 2026 година. Ова претставува клучна системска реформа која директно ја подобрува безбедноста за граѓаните, информира МВР.
Со Националната интегрирана база на податоци за безбедност на патиштата, МВР ќе обезбеди:
• побрзо и поточно идентификување на ризични локации,
• посилни превентивни мерки и навремени интервенции,
• увид во состојбата на патиштата во реално време,
• побрза реакција при инциденти,
• подобра распределба на ресурсите,
• поголема транспарентност кон јавноста.
Ова значи повеќе безбедност, помалку несреќи и поквалитетни политики, со директна корист за сите граѓани и за унапредување на националниот систем за безбедност на патиштата.
Извор: kurir.mk
