Челзи ја совлада Барселона со високи 3:0 во вечерашното дерби на 5. коло во Лигата на шампионите. Лондончани покажаа повеќе желба да дојдат до победата и на крајот сосема заслужено ја остварија третата победа, нанесувајќи и го на Барселона вториот пораз во најсилното натпреварување. На првиот гол на „сините“ кој беше всушност автогол на Кунде во 27. минута, му претходеа два поништени гола за Челзи поради игра со рака и офсајд. Во вториот дел домашните со едне прекрасен гол на Естевао во 55. минута поведоа со 2:0, откако претходно Араухо заработи црвен картон кај гостите кон крајот на полувремето. Конечните 3:0 ги постави Делап со гол во 73. минута.
Пеп Гвардиола реши да се „коцка“ и загуби. На домашен терен против Баер (Л), „граѓаните“ се поразени со 0:2, откако тренерот на домашните реши мечот да го почне со речиси втор тим. Тоа не им пречеше на Германците кои преку Грималдо поведоа во првото полувреме, а во вториот дел Патрик Шик само ја „забетонира“ победата со гол за конени 0:2.
Наполи во второто полувреме успеа да дојде до победата над жилавиот Карабах. Италијанците најпрво промашија пенал во 56. минута (Хојлунд), но во 65. минута МекТоминај успеа да погоди со глава за водство од 1:0. Конечните 2:0 беа поставени преку автоголот на Јанковиќ во 72. минута.
Јувентус со многу маки успеа да ја оствари првата победа во Лигата на шампионите. Вечерва на гостувањето кај Бодо, „Старата Дама“ повторно трепереше до последните моменти на мечот. Бодо прв поведе со голот на Блумберг во 27. минута со што домашните заминаа со предност на полувреме. Јувентус вовзрати на стартот на вториот дел преку Опенда за 1:1, а потоа МекКени во 59. минута направи пресврт за 1:2. Бодо не се предаде и преку Фет во 87. минута од пенал израмни на 2:2, за сепак Дејвид во 91. минута да погоди за 2:3 и победа на Јуве.
Олимпик Марсеј со пресврт успеа да слави над Њукасл со 2:1. Гостите одиграа одлично прво полувреме во кое поведоа преку Харви Барнс, но по една глупост на голманот Поуп по само 30-тина секунди во вториот дел со својот прв гол Обамејанг израмни на 1:1. Истиот фудбалер во 50. минута повторно погоди за победа на Французите.
Борусија (Д) со два гола на Гираси и По еден на Адејеми и Свенсон го победи Виљареал со 4:0, додека во Прага на мечот меѓу Славија и Атлетик (Б) немаше погодоци.
Извор: vecer.mk
