Една година по несреќата кога се урна бетонската надстрешница од Железничката станица, Србија се поклонува пред жртвите од трагедијата, меѓу кои беше и 45-годишниот македонски научник Васко Саздовски кој тргнал за дома на трагичниот 1 ноември.
Бројни студенти и граѓани ширум Србија од синоќа пристигнуваат во Нови Сад. Долги колони граѓани од 16 локации пристигнаа пред железничката станица каде се одржа голем комеморативен собир. Палат свеќи и положуваат цвеќе, оддавајќи им почит на трагично загинатите. Околу 3.500 студенти два дена пешачеа од Белград. Студентите од Нови Пазар пристигнаа по 400 километри марширање. На местото на трагедијата дел од присутните побараа правда, оставки и одговорност.
-Една година подоцна, 16 жртви, 0 одговорни, а пораката е и понатаму иста. Рацете им се крвави, изјави студентка
-Не им се гледаат ниту лицата, ниту имињата, ниту зборовите не им се слушаат од темнината – Тихомир Станиќ – српски актер.
Граѓаните на Нови Сад со тага зборуваат за болката која, како што велат и по една година не поминува. Велат дека се уште чекаат правда и одговорност.
-Многу тажно. Чекаме ова да се разреши, да се утврди апсолутна одговорност.
-Јас цела година се чувствувам очајно. Тажно. Се сеќавам дека овде бев минатата година овој ден. И понатаму не можам да верувам што нам ни се случи.
-Да покажеме зошто сме овде, зошто сме на улиците речиси една година. А тоа е одговорност за сите кои се виновни за цела корупција која се случува во земјата. Не само за падот на настрешницата, туку и генерално, велат дел од граѓаните.
Владата на Србија го прогласи 1 ноември за ден на жалост. Српскиот државен врв утрово присуствуваше на помен за загинатите во црквата Свети Сава во Белград со кој чиноначалствуваше српскиот патријарх Порфириј. Српскиот претседател Александар Вучиќ, кој беше меѓу присутните, по настанот не даде изјава, но на социјалните мрежи со свеќа во раката уште еднаш изрази длабоко сочувство до семејствата на загинатите и испрати порака денот да заврши во мир и молитва за починатите. Тој во јавно обраќање синоќа им се извини на студентите и демонстрантите за некои работи шти ги кажал и повика на помирување и дијалог.
-Знам дека многумина и понатаму се многу лути и чувствуваат немоќ што се уште не се уврдени виновниците за тој ужасен настан, а камоли казнети. Не морам да нагласувам дека тоа е и за мене разочарувачки. Иако таквите процеси се комплицирани и траат долго и во многу напредни земји. Како што некои покажаа бес во некои моменти и сам реков некои работи за кои ми е жал што ги изговорив, како на студентите така и на демонстрантите и други луѓе со кои не се согласував. Се извинувам за тоа, изјави Вучиќ синоќа.
Сепак, студентите и граѓаните продолжуваат со барањата за оставка на Вучиќ и владата. Порачаа дека извинувања не се доволни туку велат дека очекуваат вистински промени и правда. Трагедијата во Нови Сад означи и почеток на масовните студентски протести и блокади кои траат веќе една година, а со кои се бара одговорност и распишување избори . Иако по несреќата беа уапсени неколку лица, меѓу нив поранешни раководители на градската управа и изведувачи поврзани со реконструкцијата, а српскиот министер за градежништво Горан Весиќ поднесе оставка, граѓанските организации реагираат дека судски епилог сè уште нема.
Извор: vecer.mk
