Милијардерот го запали интернетот: „Ако вештачката интелигенција ги избрише работните места – можеби тие и не биле вистински работни места“

Извршниот директор на компанијата „OpenAI“, Сем Алтман, предизвика нов бран реакции со своите коментари за иднината на трудот во ерата на вештачката интелигенција. Говорејќи на конференцијата „DevDay“, Алтман изјави дека работите кои наскоро ќе ги замени вештачката интелигенција „можеби и не биле вистински работи уште од самиот почеток“.

Во разговор со новинарот Рован Чанг, Алтман се обиде да објасни дека секоја технолошка револуција ја менува природата на трудот, но неговата изјава предизвика остри реакции.

На прашањето дали AI автоматизацијата би можела да избрише до милијарда работни места, тој ја спореди сегашната структура на трудот со онаа од пред половина век.

„Еден земјоделец од минатото веројатно би погледнал во тоа што јас и вие денес го работиме и би рекол дека тоа не е вистинска работа”, изјави Алтман.

„Кога одгледувате храна, правите нешто што навистина им треба на луѓето. Тоа е вистинска работа. Но, она што поголемиот дел од нас денес го работи, тие би го виделе како игра што го пополнува времето.“

„Луѓето секогаш ќе најдат нешто што ќе сакаат да прават“
Алтман додаде дека таа перспектива делумно го смирува, но и го загрижува од други причини.

„Можеби работите на иднината ќе изгледаат уште помалку ’вистински‘ од нашите сегашни“, рече тој.

„Но, сигурен сум дека луѓето секогаш ќе најдат нешто што ќе сакаат да го прават.“

Овој став повторно ја отвори дебатата за тоа колку се свесни Алтман и останатите лидери во индустријата на вештачка интелигенција за општествените последици на сопствените технологии.

Критичарите тврдат дека неговите коментари покажуваат недостаток на емпатија кон работниците чии професии ќе исчезнат, додека тој се обидува да го прикаже губењето на работните места како „еволуција на трудот“.

Иако Алтман вели дека верува во човечката приспособливост, многумина предупредуваат дека реалноста не го следи тој оптимизам.

Според последните анализи на економистите, вештачката интелигенција би можела да влијае на повеќе од 40 проценти од глобалните работни места во наредната деценија.