Советот за безбедност на Обединетите нации денес ќе одржи итен состанок на кој ќе се разговара за упадите на руските авиони во естонскиот воздушен простор, потврдија естонски и ОН претставници.
Естонија побара итен состанок откако три руски борбени авиони МиГ-31 влегоа во нејзиниот воздушен простор над Финскиот Залив во петокот без дозвола, каде што останаа 12 минути пред да бидат пресретнати од НАТО, објави Си-Ен-Ен.
Естонскиот министер за надворешни работи, Маргус Цахкна, во неделата на социјалната мрежа X изјави дека постапките на Русија „ги поткопуваат принципите што се клучни за безбедноста на сите земји-членки на ОН“.
„Кога ваквите дејствија ги извршува постојана членка на Советот за безбедност, тие мора да бидат разгледани од страна на тоа тело“, напиша Цахкна.
Според естонското Министерство за надворешни работи, се очекува Советот за безбедност да дискутира за она што тие го нарекуваат „бесрамно, неодговорно и флагрантно кршење на воздушниот простор на НАТО“ и „повторени кршења на меѓународното право“ од страна на Русија.
Од друга страна, руското Министерство за одбрана негираше дека неговите авиони влегле во естонскиот воздушен простор, тврдејќи дека летовите биле спроведени „во строга согласност со меѓународните правила“.
Извор: tv21
