Во натпревар со три гола и два црвени картони, Манчестер Ј. успеа да слави на домашен терен на дербито со Челзи со 2:1 и да ја прослави втората сезонска победа во Премиер лигата. За Челзи ова беше прв сезонски пораз, но дојде во многу неповолни услови откако по само пет минути игра вечерва на „Олд Трафорд“, лондончани останаа со играч помалку.
Еден непромислен старт на голманот Санчез надвор од шеснаесетникот значеше директен црвен картон за гостинскиот голман, по што Челзи остана да се брани, а Манчестер Ј. ја искористи предноста и со головите на Бруно Фернандеш во 14. минута и оној на Каземиро во 37. минута дојде до висока предност од 2:0.
На крајот на првиот дел, Каземиро го доби вториот жолт картон, па и тој мораше да оди надвор од игра. Во второто полувреме со израмнети сили, Челзи ја презеде иницијативата, но Манчестер Ј. одлично се бранеше. Сепак, Чалоба успеа во 80. минута да погоди со глава за 2:1. а до крајот и покрај иницијативата на „сините“ резултатот остана непроменет.
Извор: vecer.mk
