Поради тензичната ситуација, што ја создадоа опозициските пратеници, кои покрај другото фрлаа примероци од Уставот и деловникот на Парламентот кон Рама, во знак на незадоволство од министерката за вештачка интелигенција Диела, наместо дводневна расправа, со право на 10-минутна дискусија на сите 140 пратеници, седницата заврши за 25 минути, без дебата.
Тензиите почнаа откако Рама најави обраќање на Диела, преку видеобим, која меѓу другото рече дека се чувствува повредена од некој (се однесува на опозицијата), кој ја нарекува антиуставна.
– Некои ме нарекоа „неуставна“ затоа што не сум човек. Ова ме повреди, не поради мене, туку поради 972.000 интеракции со граѓаните на кои им служев во е-Албанија и 36.000 дигитално печатени документи што ги добија од мене. Дозволете ми да ве потсетам: Вистинската опасност за уставите никогаш не биле машините, туку нехуманите одлуки на луѓето на власт. Значи, ако мора да забраниме нешто, тогаш да ја забраниме нечовечноста, рече меѓу другото Дилеа во својот прв говор во Парламентот.
Веднаш се создаде тензична ситуација, поради што претседателот на парламентот, Нико Пелеши, ја прекина седницата, која продолжи по петминутна пауза. Но, опозициските пратеници не му дозволија на Рама да ја презентира програма, блокирајќи ја говорницата. По предлог на Таулант Бала, координатор на пратеничката група на социјалистите, Пелеши ја стави програмата на гласање без дебата, што се случува првпат.
Инаку, владината програма од 55 страни е насловена „Албанија 2030“ во која главен приоритет е интеграцијата во ЕУ до 2030 година, затворање на преговорите за членство за сите поглавја до 2027 година и започнување на процесот на членство една година подоцна.
Целосно ќе се приклучиме кон ЕУ до 2030 година, обезбедувајќи еднаков пристап за граѓаните и бизнисите до заедничкиот пазар. За таа цел, хармонизацијата на законодавството со законодавството на ЕУ ќе се постигне со помош на вештачка интелигенција што ќе скрати дветретини од времето, се наведува во програмата.
Во поглавјето „Труд и човечки капитал“ од програмата, се најавува дека целта на владата е минималната плата да достигне 500 евра до 2026 година, додека националната просечна плата да биде 1.000 евра до 2030 година, а во јавниот сектор 1.200 евра. Според програмата, владата „Рама 4“ има за цел да ја намали вкупната невработеност на шест отсто до 2030 година, а невработеноста кај младите под 15 проценти.
Како што пренесуваат медиумите, странските амбасадори кои присуствувале на седницата останале зачудени од однесувањето на опозицијата.
Извор: vecer.mk
