Шафранот (лат. Crocus sativus) обично ни е познат како
најскапиот зачин во светот, но ова растение се одгледува и поради своите
прекрасни цвеќиња и се издвојува како еден од најубавите делови од секоја
градина или балкон.
Го добило името од арапскиот збор za‘farān, кој е изведен
од персискиот израз што значи „златно“, и алудира на бојата на шафранските
нишки и онаа што им ја дава на ткаенините.
Прекрасниот шафран се споменува и во грчката митологија,
во приказната за Крокус, љубовникот на Хермес кој случајно бил убиен додека
боговите го фрлале дискот, а неговото тело, според верувањето на античките
Грци, се претворило во виолетов цвет од шафран.
Сепак, постои и друга приказна, за пријателот на Смилакс
кој бил претворен во шафран од боговите поради неговата невозвратена љубов кон
својот пријател, за која Овид пишувал во „Метаморфози“.
Зошто шафранот
се сади во септември?
Шафранот се смета за есенско растение и неговиот природен
циклус започнува кон крајот на летото, поради што луковиците се садат во
септември, додека земјата е сè уште топла, за да можат правилно да се вкоренат
до зимата.
Цветањето се случува во октомври или ноември, но трае
само две до три недели. Токму ова кратко траење го прави шафранот редок и
скапоцен, а тој произведува прекрасни виолетови или сино-виолетови цветови, со
карактеристични потемни ленти на ливчињата.
Додека повеќето растенија се во мирување, шафранот
внесува боја и живот во градината, што ја прави вистински бисер кон крајот на
сезоната.
Како да се
грижите за шафранот?
Локација и почва. Најдобро расте во сончеви, добро
дренирани области, а луковиците се садат на длабочина од 7-10 см, со растојание
од 7-8 см.
Наводнување. Шафранот се наводнува минимално бидејќи
прекумерната влага може да доведе до гниење на луковиците.
Ѓубрење. Напролет, шафранот има корист од ѓубрење со
фосфор и калиум, што го стимулира новиот раст и го зајакнува растението за
следната сезона. Есенското ѓубрење не се препорачува веднаш по садењето, но
шафранот се сади во подготвена и збогатена почва.
Извор: vecer.mk
