Коалицијата Вреди остро ја обвини ДУИ дека две децении наназад го разнебитувала системот и ги оставила граѓаните да живеат во корупција и загадување.
„ДУИ, која две децении по ред ги труеше граѓаните со корупција, денеска најде храброст да зборува за воздухот во Скопје. Дволичноста нема граници. Каде бевте кога Скопје секоја година беше меѓу најзагадените градови во светот? Каде бевте кога граѓаните протестираа за чист воздух и против дивите депонии, додека вие правевте математики околу тендерите?“, порачаа од Вреди.
Од коалицијата додаваат дека токму во времето на ДУИ се создавале депониите околу Скопје, во Тетово, Кичево и Струга, додека, како што велат, нивните функционери се збогатувале со трговски центри, нафтен бизнис и соларни централи.
Министерството за животна средина и просторно планирање, предводено од првиот вицепремиер Изет Меџити, веднаш реагираше на обвинувањата.
„Ситуацијата е под контрола и граѓаните се информираат навремено. Палењето на депониите било во ‘Дрисла’, во Шуто Оризари или во Трубарево, во пресрет на изборите, ја отвора темата за обиди за дестабилизација на кои и претходно укажувавме. Граѓаните добро знаат кој е одговорен и на 19 октомври ќе го дадат заслужениот одговор“, стои во реакцијата од Министерството.
