Жените во Авганистан се најрепресираните во светот, соопшти мисијата на ОН

И покрај првичните ветувања за поумерен пристап, талибанците воведоа построги мерки кои дополнително ги загрозуваат правата на жените и ги ограничуваат слободите

Жените во Авганистан живеат во најрепресивен режим, што се однесува до нивните права, соопшти денеска мисијата на Обединетите нации (ОН) по повод Меѓународниот ден на жената – 8 Март. Мисијата на ОН ги повика талибанските власти во земјата да ги укинат строгите ограничувања наметнати на женската популација од страна на нивниот режим.

Радикалната исламистичка група, која се врати на власт во земјата во август 2021 година, по повлекувањето на силите на САД и на НАТО, првично вети дека ќе ги овозможи правата на жените и малцинствата.

И покрај првичните ветувања за поумерен пристап, талибанците воведоа построги мерки кои дополнително ги загрозуваат правата на жените и ги ограничуваат слободите.

Талибанците го забранија образованието на девојчињата по шесто одделение. На жените им е наредено да се придржуваат кон строги правила на облекување, а исто така, според извештаите не смеат да престојуваат на јавни места како што се паркови и спортски сали. Жените во Авганистан исто така не смеат, односно им е забрането од талибанските власи да работат во национални и меѓународни невладини организации, додека патувањето или работата надвор од домот се во голема мера ограничени, пишува Радио Слободна Европа (РСЕ).

Меѓународната организација на трудот на 7 март објави дека вработеноста на авганистанските жени е намалена за 25 отсто по враќањето на талибанците на власт.

Во соопштението на ОН, пак се наведува дека авганистанските власти покажале речиси „едноумен фокус на наметнување правила кои ги оставаат повеќето жени и девојки ефективно заробени во нивните домови“.

„Авганистан под талибанците останува најрепресивната земја во светот во однос на правата на жените. Беше вознемирувачки да се видат нивните методички, намерни и систематски напори да ги истиснат авганистанските жени и девојки од јавната сфера“, .

вели Роза Отунбаева, специјален претставник на генералниот секретар на ОН и шеф на мисијата во Авганистан

Агенциите за помош и хуманитарните групи проценуваат дека повеќе од половина од 38 милиони луѓе во Авганистан страдаат од глад, а децата најмногу се изложени на ризик од неухранетост.

Во соопштението на ОН се додава дека сите Авганистанци ги чувствуваат ефектите од суровиот третман на жените и дека тоа „ќе одекнува низ генерациите“. Околу 20 жени денеска по повод 8 Март одржаа редок протест во Кабул, повикувајќи ја меѓународната заедница да интервенира и да обезбеди заштита за Авганистанците, пренесе АФП.