Аргентина ја победи Венецуела со 3-0 во квалификацискиот натпревар за Светското првенство, а Лионел Меси (38) постигна два гола неговиот последен меч за репрезентацијата на домашен терен. Меси беше видливо емотивен по натпреварот во Буенос Аирес, велејќи дека „отсекогаш сонувал“ да се збогува со своите домашни навивачи, објави ESPN.
Аргентинската ѕвезда се збогува со стил, постигнувајќи два гола, а Лаутаро Мартинез додаде еден. Запрашан за неговиот настап на Светското првенство следното лето во САД, Мексико и Канада, Меси кратко одговори: „Ќе видиме“.
„Толку многу емоции доживеав на овој терен. Секогаш е радост да се игра во Аргентина. Со години уживавме во секој натпревар. Многу сум среќен, мојот сон беше да завршам тука. Денес беше последниот натпревар за освојување поени тука“, рече Меси.
Аргентина веќе обезбеди место на Светското првенство во 2026 година како прва екипа на табелата на КОНМЕБОЛ пред натпреварот. Иако Меси изрази желба да игра, тој нагласи дека ќе го следи своето тело во наредните месеци за да донесе конечна одлука.
„Како што реков претходно за Светското првенство, не мислам дека ќе играм уште еднаш. Со оглед на моите години, логично е дека нема да успеам. Но, како што секогаш велам, одиме ден по ден, следејќи како се чувствувам. Кога се чувствувам добро, уживам, но кога не, искрено, не се забавувам добро. Па, ќе видиме. Сè уште не сум донел одлука за Светското првенство“, рече тој.
Меси, најдобар стрелец на Аргентина (114) и најмногу настапи (194), го имаше своето деби на Светското првенство во 2006 година на само 18 години. Тој ги предводеше до финалето на Светските првенства во 2014 и 2022 година, а круната на неговата кариера дојде со освојувањето на трофејот во Катар.
Аргентина сега се соочува со последниот квалификациски натпревар против Еквадор на гостински терен, а Меси потврди дека нема да игра на тој натпревар.
Извор: vecer.mk
