„Можеби не сме направиле мноу, но 40 години не се донесе Законот за Медресето, ВЛЕН за една година успеа да го официјализира медресето Иса Бег и учениците од ова средно училиште да имаат ист статус како сите останати ученици во средните училишта во земјата.“ Ова го изјави првиот вицепремиер и кандидат на ВЛЕН за градоначалник на општина Чаир, Изет Меџити, на средба со жителите на населбата Дуќанџик.
Меџити, придружуван од носителот на советничката листа на ВЛЕН во Чаир, Мухамед Муртези, и пратеникот Беким Сали, беше пречекан во конакот на хаџи Ибрахим, каде што ги презентираа реализираните работи во изминатата година и конкретните планови за иднината. Тој потенцираше дека ВЛЕН за само една година успеа да реализира закони и проекти кои ДУИ не ги направи повеќе од две децении, додека го критикуваше неговиот противкандидат, Бујар Османи, дека пред жителите зборува за сателити и астрономија, заборавајќи ги секојдневните проблеми на чаирчани.
„Можеби не сме направиле многу, но 40 години не се донесе Законот за Медресето, ние ВЛЕН за една година успеавме да го официјализираме медресето Иса Бег и учениците од ова училиште да имаат ист статус како сите останати ученици во средните училишта во земјата. Можеби не сме направиле многу, но за една година го направивме тоа што ДУИ не го направи 22 години, Законот за правична и адекватна застапеност на Албанците во државната и јавната администрација. Можеби не сме направиле многу, но го завршивме каналот во Арачиново, овие денови започнуваме и ќе го завршиме и каналот во Хасанбег каде што од едно невреме и поплава имавме 20 жртви. Можеби не сме направиле многу, но секојдневно по малку работиме за нашите населби и денеска сме тука да зборуваме за тоа што сме направиле за една година, за тоа што ќе се направи до изборите и да образложиме заедно со вас зошто ја бараме довербата на граѓаните во Дуќанџик, Серово, значи не кај Борел и Лајчак, бидејќи можеби со нив не се разбираме, но со жителите на Дуќанџик, Серово, Гази Баба, Дижонска многу добро се разбираме, затоа што не зборуваме за сателити, не зборуваме за астрономија, ние зборуваме за елементарните услови на Чаир,“ изјави првиот вицепремиер, Изет Меџити.
Во една друга јасна порака, Меџити ги увери жителите на Дуќанџик дека неговите дела не зависат од изборите, најавувајќи инвестиции за оваа населба и за целиот Чаир.
„Ние зборуваме за фактот дека од министерството кое го водам јас, издвоив 2 милиони евра и прашање на ден е кога ќе започне проектот со кој сите улици и улички во Дуќанџик ќе добијат водовод, канализација и атмосферска мрежа со цел веќе да не ве боли главата секогаш кога врне дожд да се грижите како ќе заврши. Ова не е дека ќе се направи ако ме гласате, ова ќе се направи, без разлика на изборите, значи 2 милиони евра за Дуќанџик, 2 милиони евра за Саат Кула, таму од времето на Тито не е направено ништо, не дека не сме сакале туку затоа што немало влада што ги поддржувала општините во вакви проекти,“ изјави Меџити пред жителите на Дуќанџик.
Според Меџити, пораката е јасна, Чаир има потреба од луѓе кои работат за граѓаните, а не од политичари кои зборуваат за галаксии и сателити. Повикот на ВЛЕН до чаирчани е да изберат алтернатива која носи конкретна работа и видливи проекти.
