Веќе еден месец помина од објавувањето на негативниот извештај на Државниот завод за ревизија за трошењата во Министерството за надворешни работи во времето кога министер беше Бујар Османи, а Обвинителството и судството сè уште немаат преземено никакви мерки. Ревизорите констатирале дека над 120 милиони денари (околу 2 милиони евра) биле потрошени за организација на самитот на ОБСЕ во Скопје без соодветна документација, без евиденција за испорачани стоки и услуги и без трајна опрема што требало да остане државна сопственост. Овие наоди отвораат сериозни сомнежи за нетранспарентност и злоупотреба на јавни средства.
ВЛЕН потсетува дека Османи и во времето кога бил министер за здравство добил негативен извештај со забелешки за незаконити дејства и сомнителни плаќања, по што судството го амнестирало. „Очигледно е дека постои структура која го штити и го следи Бujar Османи како нејзин миленик. Денес повторно гледаме ист модел – Обвинителството и судството молчат,“ велат од ВЛЕН.
Од партијата додаваат дека доколку бил кој било друг граѓанин, ќе сносел одговорност дури и за сообраќаен прекршок, но за Османи, како што наведуваат, важат други правила. „Јасно е дека е под заштита на некого, а тоа значи само едно – дека тој има долгови на друго место, но не кон Албанците или граѓаните на Чаир,“ реагира ВЛЕН.
Според нив, Јавното обвинителство има законска обврска да отвори предмет по негативен извештај на ДЗР. „Ако тоа не се случи, ова ќе биде вторпат институциите свесно да го амнестираат Бујар Османи за исти сомнежи и злоупотреби,“ се вели во реакцијата.
„Граѓаните заслужуваат вистина, отчетност и правда, а не политички имунитет за оние кои ја злоупотребиле државата за лична корист,“ порачуваат од ВЛЕН и додаваат дека ќе продолжат гласно и доследно да бараат одговорност до крај.
