Институционален пинг понг за избор на нов претседател на ДКСК, откако антикорупционерите му се обратија на Собранието. Денеска тоа повторно ја врати топката кај нив-тие да дадат мислење дали во период на веќе распишани избори треба да донесат одлука за избор на прв човек на Антиорупциска.
Во краток допис Собранието им посочува:
„Со престанокот на мандатот на претседателката на ДКСК Собранието постапи согласно роковите утврдени во Законот за спречување на корупцијата и судир на интереси. Тоа се законски рокови кои мора да бидат испочитувани. За понатамошно постапување во Собранието ќе се направат соодветни консултации. Дополнително, Собранието денеска упати барање за мислење до ДКСК.“
Ова следува откако ДКСК побара мислење од парламентот. Како ќе постапат антикорупционерите по денешниот допис од Гаши? Во текот на денот од Антикорупциска ни потврдија дека е пристигнат дописот, но сепак доцна попладнето не беа достапни за официјален став. Потврдија дека комисијата го разгледува добиениот допис од Гаши. Во меѓувреме за утре е закажана седница на Комисија за прашања на изборите и именувањата, а на дневен ред е Формирање на Комисија за селекција на кандидати за претседател на ДКСК.
Иако законски јасно е објаснето дека избор на претседател на комисијата не спаѓа во итни и неодложни работи што води во насока на тоа дека би требало изборот да се стави во мирување, сепак се уште се чекаат официјалните ставови. Претходно, поранешната претседателка на ДКСК Билјана Ивановска кажа дека очекува самата постапка за избор да се одолговлекува до самиот крај.
Билјана Ивановска-поранешна претседателка на ДКСК
„Се ближат избори, нека си мислат сите тие пратеници каква доверба во нив ќе имаат граѓаните. Очекувам дека ќе се одолговлекува до последно. Во законот стои дека Собранието може да ја разреши доколку шест месеци неоправдано отсуствува од работа, може ќе играат и на таа карта бидејќи таа неоправдано отсуствува од работа.“
Државната комисија за спречување на корупцијата остана без претседател, откако Татјана Димитровска си поднесе оставка во Собранието, поради бурните реакции во јавноста за двете обвиненија за неа за оддавање службена тајна и компјутерски сертификат. Димитровска е опфатена во случајот „Адитив“ кој се однесува за сомнителна набавка на адитиви за ТЕЦ Неготино и ЕСМ.
Извор: 24vesti.mk
