Од вкупно 2.850 стоматолози во земјата, преземањето на надлежностите од Стоматолошката комора од страна на Министерството за здравство предвидува во наредните два месеци без лиценци да останат околу 50% од стоматолозите. Но, министерот Азир Алиу потврдува дека од денес е структуриран алгоритмот – од апликацијата на стоматолозите до издавањето на нови лиценци или продолжувањето на оние што истекуваат во овој период.
„Од денес, ве информирам дека сите апликации за лиценци може да се поднесуваат кај нас. Секторот за стоматологија ќе ги потпишува одлуките, покрај дневните обврски што ги имаат, сега ќе бидат задолжени заедно со вработените во Комората да ги процесираат сите барања на стоматолозите. Нема да има застои, ќе има само ред и закон.“, вели Азир Алиу.
Министерството за здравство ги презеде и обуките за стоматолозите, кои ќе се организираат преку Стоматолошкиот факултет во Скопје и Стоматолошкиот факултет во Тетово во хибридна форма. Алиу изјави дека овие два јавни факултети ќе ги спроведуваат обуките во своите простории и онлајн.
„Она што го потпишав, го направив врз основа на документи и факти. Имав состанок уште еднаш, ве информирам дека одржавме 2-3 средби, покрај со работната група на Комората, се сретнав и со директорот. Ја ценам и стојам зад мојата одлука и потпис.“, вели Азир Алиу.
Прекинот на надлежностите на Стоматолошката комора доаѓа поради, како што велат од Министерството, индиции за финансиски манипулации преку здруженија кои тие ги сметаат за нелегитимни, а кои организирале обуки за стоматолозите. Но, овие тврдења вчера беа демантирани од претседателот на Комората, Маријан Денковски, кој апелира до надлежните органи да го испитаат случајот, бидејќи, според него, досега ниту една контрола не утврдила неправилности. Освен Финансиската полиција, се очекува и Јавното обвинителство да ги разгледа сомнителните елементи според Министерството за здравство.
Инаку, обуките за стоматолозите, семинарите и симпозиумите се задолжителни за постигнување на 20 поени за продолжување на работните лиценци на секои 7 години.
ИЗВОР: ТВ 21
