Ќе консултираме правни експерти за тоа дали Државната изборна комисија ќе може да носи нов Правилник, ретерираше премиерот Мицкоски откако вчера тој побара од нив да донесат нов кој претходно го укинаа. Ваквата изјава доаѓа откако дел од експертската јавност реагираше дека не може ДИК со упатство да го регулира учеството на независните кандидати на локалните избори, бидејќи тоа не е нејзина надлежност.
„Министерството за правда ќе има состанок со дел од тие експерти, чекаме да видиме што мислат и да повлечеме таков потег, инаку, ќе се постапи секако според законот, нема да се постапи надвор од законот“, вели Христијан Мицкоски.
Претседателот на Државната изборна комисија Борис Кондарко вели дека до крајот на неделава ДИК ќе го прецизира упатството за поднесување независни кандидатури. Тој го повтори ставот дека нема да има потреба да собираат потписи и дека сите подеднакво ќе учествуваат на изборите, било да се политички партии или група избирачи, односно независни кандидати.
„Група избирачи ќе можат да учествуваат на изборите со поднесување на свои листи, без собирање на потписи, бидејќи Уставниот суд ги укина одредбите од законот за бројот на потребни потписи. Меѓутоа правото предвидено во законот постои. Тоа никој не може да го оспори ниту ДИК може да одлучува во врска со тоа, едноставно директно го применува законот, така што правото е неспорно“, вели Борис Кондарко.
Државната изборна комисија во саботата на седницата кога беа распишани изборите, донесе и одлука за укинување на Правилникот кој се однесуваше на собирање потписи на независните кандидати. Тоа отвори правна дилема дали независните ќе мора да собираат потписи за да настапат на изборите или не. Бидејќи останаа во неизвесност тие се одлучија да формираат политички партии.
ИЗВОР: ТВ 21
