Претседателите на Јужна Кореја и САД, Ли Џе Мјунг и Доналд Трамп, ќе се сретнат во Вашингтон на 25 август за да разговараат за зајакнување на економската и безбедносната соработка, објави денеска канцеларијата на шефот на јужнокорејската држава.
Ли Џе Мјунг беше избран за претседател на предвремените избори во јуни, а како приоритет го наведе позиционирањето на оваа извозно ориентирана земја во глобалното трговско опкружување, кое драматично се менува поради царинските политики на Трамп.
-Врз основа на договорот постигнат минатиот месец, двајцата лидери ќе се обидат да отидат чекор понатаму преку партнерство во производствениот сектор, вклучувајќи полупроводници, батерии и бродоградбата, изјави портпаролот на претседателскиот кабинет, Канг Ју-џунг.
Освен економската соработка, тема на дискусија ќе биде „развојот на сеопфатна безбедносна соработка, фокусирана на иднината“, истакна портпаролот.
Трамп кон крајот на јули објави дека двете земји постигнале трговски договор според кој јужнокорејските производи ќе бидат оданочени со царини од 15 проценти, со што ќе се намалат првично планираните царини за еден од водечките трговски партнери на Америка. Трамп рече дека Сеул ќе презентира инвестиции во вкупен износ од 350 милијарди долари што тој „лично ќе ги избере“.
Извор: 24vesti.mk
