Директорот на Бирото за јавна безбедност, Александар Јанев денеска беше во посета на СВР Тетово каде оствари средба со раководството, на која детално ги разгледале сите околности и преземените мерки по вчерашниот вооружен инцидент, во кој беше одземен еден живот, а повредени се четири лица.
-Сакам граѓаните на Тетово и регионот да знаат дека полицијата е целосно мобилизирана и посветена таа е на терен, се преземаат сите активности со кои ќе ја гарантираме и испорачаме безбедноста за сите граѓани. Нема да дозволиме стравот и насилството на поединци да ја нарушат секојдневната сигурност и мирот во заедницата. Истовремено, на сторителите и сите кои мислат дека со оружје можат да решаваат спорови и несогласувања, им порачувам дека ќе бидат пронајдени, изведени пред лицето на правдата и санкционирани, дециден е Јанев.
Тој додава дека полицијата ги има ставено во функција сите потребни служби за да ги фати сите инволвирани во овој инцидент.
-Безбедноста е заедничка вредност и затоа ги повикувам сите граѓани на Тетово и насекаде низ државата да соработуваат со полицијата, да пријавуваат информации и заедно да изградиме средина во која нема место за криминал и насилство. Само заедно можеме да се спротивставиме на поединците и групите кои не споделуваат исти вредности со нас чесните. Македонија и сите нејзини граѓани заслужуваат мир и спокој, а ние сме тука да го испорачуваме, нагласи директорот на БЈБ.
ИЗВОР: kurir.mk
