Претставата „Ноќта кога ја убив месечината“ својата 26. изведба ја доживеа синоќа (9 август) на полна месечина на Големо Езеро на 2.218 метри надморска височина на Пелистер.
„Совршениот спој на вечноста отсликана низ отсјајот на полната месечина на површината на Езерото и моќната енергија на актерите инспирирани од мирот и спокојот на природната сцена, надополнети со желбата на публиката да се доживее едно ново патување низ реалноста на секојдневието, ја направија оваа изведба многу повеќе од обична театарска уметност“, соопштија од Националниот парк Пелистер.
Настанот беше организиран во соработка со Народниот театар Битола и Битолски камерен оркестар со поддршка на Општина Битола.
Претставата „Ноќта кога ја убив месечината“ е во режија на Марјан Георгиевски, кој и настапува заедно со актерот Александар Копања. Музиката за претставата ја свиреа во живо членови од Битолски камерен оркестар.
Ова за неполн месец беше вторпат Народниот театар од Битола да изведува претстава под отворено небо на езеро. На 25 јули тие на Ротинско Езеро имаа премиера на претставата „Рибарски караници“ во режија на Јован Ристовски.
Ж. ЗДРАВКОВСКА
ИЗВОР: sdk.mk
