Од 15 август почнува владината „Училишна кошничка“ која ќе трае до 15 септември. Трговците треба да ги намалат цените на училишниот прибор до 15 проценти. Целта е заштита на семејниот буџет и помал притисок врз родителите пред почетокот на новата учебна година. Министерот за економија кажа дека ланската училишна кошничка била исклучително успешна, а заштедите по ученик изнесувале од 750 до 2.000 денари.
„Одлуката предвидува обврска за сите трговци и на големо и на мало да ги намалат цените на училишниот прибор. И тоа најмалку 10 % во трговијата на големо, најмалку 15 проценти во трговија на мало. Со ова мерка се опфаќаат сите продавници што нудат училишен прибор. Од книжарници, спортски продавници до супермаркети.“, изјави Дурмиши.
Мерката опфаќа широк спектар производи како тетратки, ранци, моливи и други основни материјали. Цените ќе се споредуваат со референтната цена од 1 јуни годинава или со набавните документи за поново внесени производи.
Дурмиши денеска ќе има средба со трговците, производителите и со дистрибутерите со храна. Рече дека ова ќе биде последна опомена до нив да не си играат со цените. Во спротивно Владата ќе воведе поригорозни мерки.
„Нашето барање ќе биде да дејствуваат соодветно. Да дејствуваат според економските трошоци што они ги имаат, да не изигруваат со цени, да не ги покачат цените. Ова ќе биде крајна опомена, ова ќе биде крајна опомена што јас ќе им ја кажам.“, рече Дурмиши.
Дурмиши рече дека инфлацијата „од трпезата преминала на резервоарите“. Според него цените на храната се стабилизирале, а инфлацијата преминала во хотелските фактори, забавата, транспортот и повисоките цени на горивата.
ИЗВОР: ТВ 21
