Во меѓувреме во Грција продолжуваат протестите што избувнаа по железничката катастрофа. Штрајкот на вработените во грчката железница ќе продолжи и денеска. Како што пишува „Катимерини“, станува збор за 24-часовен штрајк, кој не се исклучува да продолжи и во наредните денови
Судските власти во Грција му одредија притвор на шефот на железничката станица во Лариса, кој беше уапсен веднаш по железничката несреќа што се случи во вторникот минатата недела, а во која животите ги загубија 57 патници, јавуваат грчките медиуми.
Распитот на педесет и деветгодишниот шеф на станицата, според „Катимерини“, траел седум часа пред да му биде одредена мерката притвор. Како што претходно беше соопштено, тој е осомничен за кривичните дела убиство и убиство од небрежност и, доколку биде прогласен за виновен во судскиот процес што претстои, му се заканува казна од 10 години до доживотен затвор.
Адвокатот Стефанос Панцарцидис минатата недела изјави дека неговиот клиент се чувствува уништено и дека ја презел одговорноста за несреќата во оној дел во кој тој смета дека е одговорен, но додаде дека и други фактори биле присутни, без да наведе детали.
„Околу 20 проклети минути тој беше одговорен за безбедноста (на железничкиот сообраќај) на цела централна Грција“,
изјави адвокатот на осомничениот чиј идентитет не се соопштува.
Во меѓувреме во Грција продолжуваат протестите што избувнаа по железничката катастрофа.
Масовен протест, кој започна мирно, се одржа пред грчкиот парламент во центарот на Атина. На вработените во железницата, кои го организираа протестот, со поддршка им се придружија синдикатите, студентските здруженија и граѓанските организации. Во еден момент, додека насобраната толпа им оддаваше почит на жртвите и го искажуваше револтот поради децениското запоставување на железничкиот систем во земјата, избија судири меѓу полицијата и демонстрантите.
Железничките работници, пренесуваат грчките медиуми, велат дека железничката мрежа во земјата е во многу лоша состојба поради кратењето на трошоците за нејзино одржување и недоволното инвестирање, а како последица на должничката криза во земјата во периодот од 2010 до 2018 година.
Грчкиот премиер Киријакос Мицотакис, кој рече дека несреќата е последица на човечка грешка, призна дека децениското запоставување можело да придонесе за катастрофата, оценета како една од најтешките во живата меморија на Грција.
„Како премиер, им должам на сите, но најмногу на роднините на жртвите, извинување… Правдата многу брзо ќе ја истражи трагедијата и ќе ги утврди обврските“,
напиша Мицотакис на својот фејсбук-профил.
„Ова злосторство нема да биде заборавено“,
извикуваа демонстрантите во Атина додека пуштаа црни балони оддавајќи им почит на жртвите во железничката несреќа.
На транспарент што го носеа пишуваше:
„Нивните политики чинат човечки животи“.
Синдикатите на железничарите велат дека безбедносните системи на железничката мрежа се дефицитарни со години бидејќи системот за далечински надзор и сигнализација не бил испорачан навреме. Тие ја повикаа владата да изготви план и мерки за спроведување на безбедносните протоколи.
Мицотакис вчера рече дека доколку постоел далечински систем на железничката мрежа „во пракса ќе беше невозможно несреќата да се случи“, пренесува Ројтерс.
Штрајкот на вработените во грчката железница ќе продолжи и денеска. Како што пишува „Катимерини“, станува збор за 24-часовен штрајк, кој не се исклучува да продолжи и во наредните денови.
ИЗВОР: 360stepeni.mk
