Во Скопје се подготвуваат 6-7 мултифункционални центри за 2028, кога градот ќе биде Европска престолнина на културата, рече денеска министерот за култура и туризам Зоран Љутков.
Министерот и в. в. градоначалникот на скопската општина Аеродром, Дејан Митески, денеска најавија дека во наредниве две и пол години населбата Ново Лисиче ќе добие мултифункционален простор со киносала, изложбен простор и мултимедијален дел, објект кој треба да послужи најмногу на независната сцена уметници.
„Ова е многу важен проект за културата, бидејќи Скопје ќе биде Европска престолнина на културата во 2028 година. Шест или седум вакви мултифункционални центри во Скопје се во тек на изградба или почнуваат да се градат и се надеваме дека до 2027 година ќе бидат завршени и во 2028 да ги имаме девет или десет, надвор од националните објекти кои ќе можат да ги примат и странските уметници за да можеме да им обезбедиме нормални услови за работа“, кажа Љутков.
Изградбата на мултифункционалниот објект во близина на спортскиот центар „Марко Божиновски“ ќе чини 99 милиони денари за првата фаза, а потоа следи опремување.
„Во Општина Аеродром не постои културен центар. Како Министерство потпишавме над 20 договори со повеќе општини што треба да послужат на независната сцена. Тоа ќе биде простор за развој и промоција на културата на Аеродром“, рече Љутков.
Во објектот ќе има киносала со 245 столчиња, простор за изложби и мултимедијален дел комплетно опремен со сценска технологија, озвучување и осветлување. Ќе има големина од 1.400 квадртани метри.
„Општината ќе го менаџира преку своето јавно претпријатие. Веднаш по завршувањето на изградбата, со одлука на Советот е планирано да биде доделен на јавното претпријатие на Општина Аеродром, кое ќе менаџира понатаму со процесот на управување, организација на настани и издавање на просторот“, рече градоначалникот Митески.
ИЗВОР: sdk.mk
