Изгаснат е пожарот кај кумановското село Бељаковце, со кој противпожарните служби се бореа два дена. Во гаснењето на пожарот беа вклучени четири екипи од територијалната противпожарна единица, припадници на Дирекцијата за заштита и спасување, вработени од „Национални Шуми“ и локално население.
– Пожарот беснееше два дена. Првиот ден од 16 часот, беше локализиран извесен период, подоцна повторно се разгоре, поради ветрот, и вчера е изгаснат, околу три часот по полниќ, изјави заменик-командирот на ТППЕ Куманово Борис Станковски.
Во вечерните часови голем пожар избувнал и во кратовското село Димонце. За негово локализирање биле ангажирани екипа од Територијалната противпожарна единица (ТППЕ) Куманово и две екипи од ТППЕ Старо Нагоричане. Целосно е изгаснат и големиот пожар кој беснееше во селата Ругинце, Облавце и Сув Орах.
Во текот на вчерашниот ден пожар бил пријавен и во селото Отља, во општина Липково, како и во селото Тромеѓа каде што горело стрниште. Ноќеска, половина час по полноќ, интервенирано е и на булеварот „Октомвриска револуција“ во Куманово, каде што горел смет. Пожарот бил изгаснат за околу 30-тина минути, соопштуваат од РЦУК.
Извор: 24vesti.mk
