Со 8 милиони денари (околу 130.000 евра) кои ќе се обезбедат од ребалансот на Буџетот, ќе се реконструираат двата музеја на Калето во Скопје и ќе се работи на негова санација за да стане туристичка атракција, рече денеска министерот за култура и туризам Зоран Љутков. На прес-конференцијата на Кале, заедно со Весела Честоева, директорка на Управата за заштита на културното наследство, претседателот на Заедницата на единици на локална самоуправа (ЗЕЛС) и градоначалник на Кисела Вода Орце Ѓорѓиевски, како и други градоначалнци на скопски општини, Љутков кажа дека Калето 10 години е во запуштена и девастирана состојба.
Орце Ѓорѓиевски е кандидат на ВМРО-ДПМНЕ за градоначалник на Скопје на престојните Локални избори.
Просторот е запуштен со години; – Од денешната акција. (Фото: К. Попов)
„Неколку пати се обидовме да исконтактираме со Град Скопје и со Јавното претпријатие ‘Паркови и зеленило’, за да помогнат во процесот на чистење, но не добивавме никаков одговор. Затоа се обративме до ЗЕЛС и веќе се работи на чистење и озеленување на скопското Кале“, кажа Љутков.
Во 2011 почнаа да се градат три музеи – за праисторија, за османлиски и за средновековен период, но до ден денес ниту се отворени, ниту пак просторот е уреден.
Уште лани во октомври, Честоева кажа дека целосно изградените музеи предвидени за поставките на археолошките предмети од праисторискиот и отоманскиот периот се целосно запуштени, а видливи се и делумни оштетувања, а музејот предвиден за поставката на археолошките предмети од средновековниот период, кој не е дограден, е целосно обраснат од вегетација.
Љутков додаде дека двата музеја се во многу лоша состојба, ќе треба целосно менување на механизацијата и климатизацијата. Ќе се распише јавна набавка за поправка на овие простори. Објектот треба да се стави во функција во 2026, и веќе во 2028, како што рече министерот, кога Скопје ќе биде Европска престолнина на културата, да биде еден од најискористените.
Б. НЕСТОРОСКА
ИЗВОР: sdk.mk
