Композиторот и еден од најзначајните современи музичари Кирил Џајковски е годинашен добитник на наградата Голема ѕвезда на македонскиот филм што ја доделува Друштвото на филмски работници (ДФРМ), кажа на денешната прес-конференција, претседателот Игор Иванов-Изи. Наградата на Џајковски ќе му биде врачена на затворањето на 46. издание на Интернационалниот фестивал на филмска камера ИФФК „Браќа Манаки” во Битола, на 26 септември.
„Џајковски е филмски композитор, но пред сѐ познат скопјанец, творец на културната сцена и културниот профил на нашиот град и на нашата држава. Го знаеме од неговиот бенд ‘Бастион’, потоа се појави во ‘Леб и сол’ во албумот ‘Како какао’ и направи еден извонреден исчекор за овој скопски бенд, потоа почна да работи на театарски претстави и на филмското платно, а за неговите диџејски и соло проекти воопшто да не зборуваме. Синоним за современиот македонски звук, Џајковски е еден од најзначајните композитори и продуценти, познат по спојот на традиционални балкански мотиви со современи електронски ритми. Неговата музика е составен дел од најгледаните македонски филмови, меѓу кои ‘Бал-кан-кан’ и ‘Трето полувреме’ на Дарко Митревски, ‘Прашина’ ,’Врба’ и ‘Сенки’ на Милчо Манчевски, ‘Големата вода’ и ‘Пиарги’ на Иво Трајков (за ‘Големата вода’ ја доби наградата за најдобра музика на Фестивалот во Валенсија), како и “Балканот не е мртов’ на Александар Поповски“, рече Иванов.
Тој додаде дека, со оваа награда, македонската филмска заедница ја истакнува и ја слави уникатната уметничка визија на Џајковски, кој со својата музика ја збогати филмската и културната меморија на Македонија.
Џајковски на 15 јуни со концерт во придружба на симфониски оркестар и хор во Националната опера и балет (НОБ) прослави 25 години правење филмска музика.
- МИ СЕ ОСТВАРИ СОНОТ, РЕЧЕ КИРИЛ ЏАЈКОВСКИ, КОЈ ОДРЖА ФАНТАСТИЧЕН КОНЦЕРТ СО ФИЛМСКА МУЗИКА ВО СКОПЈЕ
Досегашни добитници на наградата на ДФРМ се Кирил Ценевски, филмски режисер и сценарист (2013); Милчо Манчевски, филмски режисер и сценарист (2014); Дарко Марковиќ, карикатурист, сатиричар, филмски режисер (2015); Сајмон Пери, филмски продуцент (2016); „Вардар Филм“, продуцентска компанија (2017); Милица Стојанова, актерка (2018); Љупчо Константинов, композитор (2019); Столе Попов, филмски режисер и сценарист (2020), Северџан Бајрам, актер (2021) ,Горјан Тозија, филмски продуцент (2022) Лабина Митевска, актерка и продуцент (2023) и Димитар Грбевски, филмски и телевизиски монтажер (2024).
ИЗВОР: sdk.mk
