Катарскиот емир ја повика меѓународната заедница да им помогне на Туркије и Сирија по земјотресот

ДОХА (АА) – Емирот на Катар денес ја повика меѓународната заедница да им помогне на Туркије и Сирија да го надминат разорувањето што го оставија зад себе земјотресите од 6 февруари, јавува Анадолу.

Говорејќи на пленарната сесија на отворањето на 5. Конференција на Обединетите нации (ОН) за најмалку развиените земји (LDC5), шеик Тамим бин Хамад ал Тани рече: „Ве повикувам сите да ги поддржите напорите на Туркије за надминување на последиците од оваа катастрофа.“

Нагласувајќи ја солидарноста со населението на Туркије и Сирија, Ал Тани рече: „Нашата средба се одржува додека нашите браќа и сестри во Туркије и Сирија продолжуваат да ги чувствуваат последиците од разорниот земјотрес што ги погоди.“

„Јас би сакал да ја потврдам потребата за пружање помош без двоумење на нашиот братски сириски народ“, нагласи Ал Тани и додаде:

„Јас сум збунет од доцнењето на помошта за овие луѓе и нагласувам дека е погрешно да се злоупотребува хуманитарната трагедија за политички цели.“

Инаку, Катар е домаќин на Петтата конференција за најмалку развиените земји што се одржува во Доха од 5 до 19 март.

Во земјотресите што ја погодија Туркије загинаа над 45.000 луѓе.

На веб страницата на Anadolu Agency (AA) објавена е само дел од содржината на вестите од Системот на проток на вести (HAS)..