Дивите автомобилски трки на автопатите во Македонија се веќе вообичаена летна појава. Спортски автомобили, донесени од западноевропски земји, добиваат простор да „горат гуми“ и да постигнат максимални брзини. Сето тоа се одвива организирано преку социјалните мрежи, каде покрај „пилотите“ зад воланот, на видеата може да се забележат и гледачи кои снимаат.
Ова видео што стигна до нашата редакција е снимено во саботата на полноќ, меѓу 19 и 20 јули на автопатот Табановце–Куманово. Но, вакви видеа кружат низ социјалните мрежи и од други градови во земјава. Го прашавме Министерството за внатрешни работи дали случајот е пријавен во полиција и дали патролите на сообраќајната полиција наишле на таква трка, која, според сведоци, траела повеќе од еден час со учество на повеќе возила.
„По пријава до СВР Куманово за одржување на диви трки на автопатот А1 на делницата од Табановце кон Куманово, поточно на крстосницата кај Крива Паланка, Единицата за мобилна безбедност во сообраќајот изврши патрола на наведената делница од 00:40 до 01:40 часот наутро, при што не беа забележани возила поврзани со пријавениот настан на диви трки.“, велат од МВР.
Инаку, годинава полицијата соопшти дека има конфискувано десет возила поради предизвикување преголема бучава и учество во нелегални трки во Скопје. Како што информираше МВР, на булеварот „Трета македонска бригада“ се одржувале т.н. диви трки со автомобили, предизвикувајќи бучава.
Модифицираните возила биле одземени поради сомнеж за технички неправилности, а по проверките од надлежните органи, на возачите им се изречени казни согласно Законот за безбедност во сообраќајот.
Од полицијата велат дека нема да има никаква толеранција за оние возачи кои ја загрозуваат безбедноста на сите учесници во сообраќајот, и дека ќе се преземат мерки против организаторите и учесниците во дивите трки.
ИЗВОР: ТВ 21
