СКОПЈЕ (АА) – Домашните и странските туристи кои го избраа културниот туризам за време на летните одмори имаа можност да го доживеат регионот на Кападокија во Турција од воздух, учествувајќи во популарните тури со балони на топол воздух, јавува Анадолу.
Кападокија, прогласена за светско културно наследство од УНЕСКО, продолжува да го привлекува вниманието на домашните и меѓународните туристи со своите уникатни самовилски оџаци, подземни градови, живописни долини, карпести манастири, цркви и светилишта, како и со разните туристички активности.
Туристите кои ја посетуваат Кападокија имаат можност да уживаат во панорамскиот поглед на пејзажот, токму преку лет со балон на топол воздух – симбол на Кападокија.
Десетици балони утринава се издигнаа над долините, создавајќи магична глетка над самовилските оџаци.
Мустафа Ерим Рустемоглу, еден од учесниците во турата, за Анадолу рече дека тој и неговото семејство се среќни што можат да ја набљудуваат Кападокија од воздух. „Тоа е прекрасно искуство. Воздухот овде е неверојатен. Погледот од балоните е прекрасен“, рече тој.
Австралиецот Брајан Блек рече дека ја избрал Турција за својот одмор откако видел фотографии од Кападокија.
Тој рече два дена ги разгледувал туристичките атракции во регионот, додавајќи: „Навистина ми се допадна Кападокија. Да се биде дел од турнејата со балони на топол воздух е особено возбудливо“.
Германската туристка Херта Остермаер, која е дојдена во Кападокија со група пријатели, рече дека геолошката структура на регионот веднаш ѝ го привлекла вниманието. „Ова е многу убаво место. Сакавме да го поминеме нашиот одмор тука оваа година. Се придруживме на турата со балони затоа што сакавме да го истражиме регионот“, рече Остермаер.
Извор: Anadolu Agency (AA)
