Продолжува битката помеѓу централната и локалната власт на Карпош за спортската сала Партизан. Откако владата одлучи да ја преземе салата во нејзино владение, од општината и денеска порачаа дека ќе ги искористат сите правни можности за одлуката да се поништи.
На вонредна седница на Советот сите советнички групи освен советниците од ВМРО-ДПМНЕ гласаа салата да не се дава на Министерството за спорт. Претседателот на Советот на општината денеска рече дека ги отфрлаат обвинувањата дека салата не била ставена во функција и го повика Премиерот да ја преиспита одлуката.
Бранко Ристов – Претседател на Совет на Општина Карпош
„Целосно сме изненадени од одлуката на Владата да ја одземе салата со образложение дека наводно ние истата не сме ја ставиле во функција. Со должна почит кон министерот работејќи по погрешна информација ја има доведено во заблуда Владата по што е донесена погрешна одлука. Имено јавно се достапни снимки во кои се гледа дека објектот спортска сала е ставена во употреба. Во истиот наводно нефункционален објект се одигруваат училишните спортски игри во одбојка и во кошарка“…..
Невена Георгиевска – Независни за Карпош
„Мора да имаат граѓаните контрола врз работата на салата Партизан. Само преку советот избраниците на граѓаните во советот ние ќе имаме контрола врз салата и како таа ќе се менаџира. Доклку отиде на влада и понатака се стопанисува како што имало случаи во минатото се плашам дека може да дојдеме во ситуација повторно да ја изгубиме оваа сала“.
Од владата остануваат на ставот дека салата е во државна сопственост и државата носи одлука кому ќе му биде дадена на користење, или таквото право му биде одземено. Повторуваат дека причината за одземање на ингеренциите е поради непочитување на обврските од договорот.
ВЛАДА
Наместо спортската сала во која се вложени државни пари за нејзина реконструкција да биде ставена во функција на спортистите и на граѓаните, жителите на Карпош добиваат изговори, навреди и обиди за манипулација со јавноста. Владата и Министерството за спорт остануваат посветени на транспарентност и одговорност во работата во интерес на граѓаните и на спортот, а не на политички игри и лични агенди.
Реновирањето на салата „Партизан“ почна во 2022 година со пари од Агенцијата за млади и спорт. Претходната влада ја предаде во владение на Општина Карпош. Реконструкцијата заврши но објектот потоа уште цела година остана под клуч, бидејќи не беше целосно опремен, за што општината и владата повторно си ги префрлаа ингеренциите.
Извор: 24vesti.mk
