30 години од масакрот во Сребреница. Во јули 1995 година силите на босанските Срби предводени од генералот Ратко Младиќ, убија неколку илјади Бошњаци во најстрашно злосторство во Европа по крајот на втората светска војна.
Според податоците на Меморијалниот центар, во и околу Сребреница убиени се најмалку 8.372 лица, претежно мажи и млади момчиња, но не беа поштедени ниту жени, девојчиња и постари лица.
Во Меморијалниот центар Сребреница – Поточари, каде се наоѓаат посмртните останки на околу 7 илјади досега идентификувани жртви, денеска ќе бидат погребани уште седум жртви, пронајдени на различни локации, меѓу кои и две 19-годишни момчиња.
Фадила Хучиќ – жител на Сребреница
„Сега кога ќе отидам кај него и кога ќе се помолам, после тоа чуствувам како да е жив и да сум седела со него. Такво чувство имам. Но болката моја никогаш нема да се смири додека не ме покрие земјата. “
На настанот присуствуваат лидери од повеќе земји, а според медиумите од Сараево, комеморацијата би можела да привлече околу 150.000 луѓе. Владата на федерацијата на Босна и Херцеговина, денешниот ден го прогласи за ден на жалост.
Дражен Чуќиќ – жител на Осиек
„За жал секоја година носиме иста порака а тоа е мир, толеранција и соживот. Зошто велам за жал, бидејќи сите знаеме што се случи овде пред 30 години и ќе продолжиме да ја пренесуваме таа порака од година во година. Ние го трчаме овој ултрамаратон за сите невини жртви на овие простори. Без разлика на националноста, пораката е иста.“
На комеморацијата присуствуваат бројни европски државници. Од Советот на Европа велат дека геноцидот во Сребреница е една од најмрачните страници во Европската историја. Почит на жртвите им оддаде и еврокомесарката за проширување, Марта Кос, според која геноцидот во Сребреница оставил длабока рана на континентот..
Марта Кос – Еврокомесар за проширување
„Наша должност е да се сеќаваме, да го кренеме гласот и никогаш да не го свртуваме погледот кога заговорниците на омраза ги доведуваат во прашање човековите права и го поткопуваат достоинството на другите. Мора да кажеме не на поделбите, не на омразата, не на глорификацијата на воените злосторници. “
Споменик со бројот „8372“, кој го претставува бројот на жртвите во Сребреница но и порака „Луѓето се сеќаваат на луѓето“ поставен во близина на Бранковиот мост во Белград…Во четвртокот, во престолнината на Србија се оддржа и комеморација во чест на жртвите а учесниците ги повикаа српските власти да престанат да го негираат геноцидот .. Сочуство до семејствата на жртвите изрази и Александар Вучиќ.
Александар Вучиќ – претседател на Србија
„Денес се одбележува 30-годишнината од ужасниот злостор во Сребреница. Не можеме да го промениме минатото, но мора да ја промениме иднината.“
Геноцидот е потврден со пресуди на Меѓународниот суд на правдата, Хашкиот трибунал и Судот на Босна и Херцеговина. Досега, 54 лица се осудени за геноцид, злосторства против човештвото и други злосторства во Сребреница, со вкупно 781 година затвор. Петмина, вклучувајќи ги Радован Караџиќ и Ратко Младиќ, се осудени на доживотен затвор.
Меѓународниот суд на правдата во 2007 година пресуди дека Војската на Република Српска извршила геноцид во Сребреница, додека Србија беше прогласена за одговорна, бидејќи не го спречила геноцидот. Генералното собрание на Обединетите нации минатата година го прогласи 11 јули за Меѓународен ден на сеќавање на геноцидот во Сребреница, осудувајќи го негирањето на геноцидот и глорификацијата на воените злосторници.
Извор: 24vesti.mk
