Му подари дрес и срдечно се прегрнаа: Дали Модриќ го „одреди“ својот наследник во Реал?

Лука Модриќ го одигра последниот меч во дресот на Реал Мадрид, со што стави крај на блескавото 13-годишно поглавје во „кралскиот клуб“.

Поразот од ПСЖ со 4-0 во полуфиналето на Светското клупско првенство беше негов 597-ми и последен настап за Реал. Со 28 трофеи, Хрватот стана најтрофејниот фудбалер во историјата на клубот и вистинска легенда на „Сантијаго Бернабеу“. По истекот на договорот, кариерата ќе ја продолжи во Милан.

По враќањето од САД, камерите на „Ел Чирингито“ го уловија Модриќ како симболично му го подарува дресот на соиграч со кој се прегрна на излегување од автобусот. Иако лицето не се гледа, шпанските медиуми тврдат дека станува збор за Арда Ѓулер момент кој многумина го нарекоа „предавање на штафетата“.

Турчинот има 20 години, дојде во Реал од Фенербахче за 24 милиони евра, и досега има 61 настап, 12 гола и 11 асистенции. Моменталната вредност на трансфер-пазарот му е проценета на 45 милиони евра. Овој потег на Модриќ во Шпанија го сметаат како бирање на својот наследник.