ИСТАНБУЛ (АА) – Шефицата за надворешна политика на блокот, Каја Калас, изјави дека Израел се обврзал на серија итни хуманитарни мерки за ублажување на кризата во Појасот Газа по „конструктивниот дијалог“ со ЕУ, јавува Анадолу.
„По резолуциите на израелскиот Кабинет и конструктивниот дијалог меѓу ЕУ и Израел, Израел договори значајни чекори за подобрување на хуманитарната ситуација во Појасот Газа“, се вели во соопштението на Каја Калас.
„Овие мерки се спроведуваат или ќе бидат спроведени во текот на наредните денови“, рече таа, посочувајќи на заедничкото разбирање дека „помошта во голем обем мора да се доставува директно до населението“ и дека „ќе продолжат да се преземаат мерки за да се обезбеди да нема пренасочување на помошта кон Хамас“.
Договорените чекори вклучуваат значително зголемување на бројот на камиони што секојдневно превезуваат храна и непрехранбени производи во Газа, отворање дополнителни премини и на север и на југ од енклавата и повторно отворање на хуманитарните рути низ Јордан и Египет.
Други клучни активности вклучуваат „овозможување на дистрибуција на залихи од храна преку пекарници и јавни кујни низ целиот Појас Газа“, „продолжување на испораките на гориво за употреба од страна на хуманитарните установи и олеснување на работата за обновување на критичната инфраструктура, како што е електричната енергија за постројка за десалинизација на вода.
Таа ја нагласи важноста на заштитата на хуманитарните работници, наведувајќи дека „заштитата на хуманитарните работници“ е меѓу мерките што треба да се спроведат.
„ЕУ е подготвена да се координира со сите релевантни хуманитарни засегнати страни, агенциите на ОН и невладините организации на терен, за да се обезбеди брзо спроведување на тие итни чекори“, се додава во соопштението.
„ЕУ повторно повикува на итен прекин на огнот, ослободување на сите преостанати заложници и ги поддржува моменталните напори на Египет, Катар и САД како посредници.“
Хамас во средата соопшти дека се согласил да ослободи 10 живи заложници како знак на „флексибилност“ за постигнување договор за прекин на огнот во Газа.
Американскиот претседател Доналд Трамп претходно изјави дека неговата администрација е „многу блиску до договор“ за прекин на огнот во Појасот Газа, додека индиректните преговори меѓу Хамас и Израел се во тек во главниот град на Катар, Доха.
Израелската Армија уби речиси 57.700 Палестинци, повеќето од нив жени и деца, во Газа од октомври 2023 година. Немилосрдното бомбардирање ја опустоши енклавата и доведе до недостиг на храна и ширење на болести.
Минатиот ноември Меѓународниот кривичен суд издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со случај за геноцид пред Меѓународниот суд на правдата поради својата војна против енклавата.
Извор: Anadolu Agency (AA)
