Од денеска до 30 јуни во Охрид се одржува 7.Балканска олимпијада по физика за средношколци. На Олимпијадата учествуваат над 60 ученици од 14 земји од Европа и три земји од Азија, со нивните професори-лидери.
На отворањето на 7.Балканска олимпијада по физика за средношколци се обратила министерката за образование и наука Весна Јаневска. Таа нагласила дека тоа што овие млади олимпијци се денеска во Охрид е резултат на нивната љубопитност и љубов кон науката, резултат на многу труд, колку нивен толку и на нивните професори и ментори.
-Тоа е формулата за градење научен подмладок што веќе утре ќе биде подготвен за откритија што ќе му помогнат на човештвото. Продолжете со посветеноста кон физиката затоа што нема напредок без наука, потенцирала Јаневска.
Посочила дека Министерство за образование и наука од оваа година дополнително ја зголеми поддршката за талентирани ученици кои учествуваат на меѓународни натпревари. Согласно новиот Закон за средно образование, Министерството ги покрива трошоците за котизација и пат, односно за учество на една од 15-те меѓународни научни олимпијади.
-Иднината зависи од тоа колку сега вложуваме во откривање и негување на потенцијалот на најталентираните. И не само за учениците, финансиска поддршка за прв пат е обезбедена и за акредитираните здруженија на наставници кои организираат меѓународни олимпијади за средношколци во Македонија, нагласила министерката Јаневска.
Натпреварот е во организација на Друштвото на физичарите на Македонија, под покровителство на Балканскиот сојуз на физика, со поддршка од Европското физичко друштво, Природно-математичкиот факултет во Скопје и Универзитетот „Св. Кирил и Методиј“ во Скопје. Дел од финансиските средства за организација на олимпијадата ги обезбеди Министерството за образование и наука.
Извор: 24vesti.mk
