По седумгодишна пауза, денеска повторно ги отвора вратите комплексот „Македонско село“, сместен на падините на Водно, во близина на Нерези. Новиот концесионер, фирмата „Ла Тераца“, беше избрана со најповолна понуда на јавниот повик организиран од Службата за општи и заеднички работи на Владата.
Од СОЗР информираа дека изборот бил спроведен транспарентно и во согласност со законските процедури, преку електронско јавно наддавање со систем управуван од Министерството за финансии.
На свеченото отворање се очекува присуство и на премиерот Христијан Мицкоски.
Комплексот „Македонско село“ се состои од 12 автентични македонски куќи, кои претставуваат дел од богатото културно наследство и традиционалните занаети. Дел од куќите се прилагодени како хотелски соби, а комплексот вклучува и ресторан со традиционална македонска кујна.
Со реотворањето на овој уникатен туристички објект, се очекува поттикнување на локалниот економски развој, отворање на нови работни места и збогатување на туристичката понуда во Скопје. Од СОЗР посочуваат дека проектот ќе придонесе за зголемен број туристи не само во главниот град, туку и низ целата држава.
ИЗВОР: ТВ 21
