Во екот на драматична ескалација меѓу Израел и Иран, Тел Авив испрати итно предупредување за евакуација, откако во раните утрински часови започна нова серија воздушни напади насочени кон објекти поврзани со иранската нуклеарна програма.
Одговорот на Техеран не доцнеше – повеќе балистички ракети удрија врз израелска територија, при што животот го загубија најмалку 10 цивили. Израелските служби за итна интервенција потврдуваат дека над 50 лица се повредени, а нападите ја погодија и територијата на градовите Реховот и Бат Јам каде има повеќе мртви а причинета е и голема материјална штета врз цивилни објекти, додека израелските служби јавуваат дека потрагата по повредени и загинати сеуште трае. Ирански напади се регистрирани и во северниот дел на Израел, вклучувајќи го и палестинско-израелскиот град Тамра, каде што била погодена и една станбена зграда, а ракетен напад врз израелски цели извршил и Јемен, Хутиите ја погодиле Јафа во централен Израел со неколку балистички ракети.
За Иран одговорот на нападите врз Израл се акт на самоодбрана, додека министерот за надворешени работи Абас Агачи за тамошните медиуми изјавил дека конфликтот може да се прошири на соседните земји, додека пак Германија, Франција и Велика Британија изразија подготвеност да отпочнат преговори со Иран во врска со неговата нуклеарна програма, со цел да се ублажат тензиите на Блискиот Исток.
Со реакција се јави и Американскиор претседател Доналд Трам кој се закани дека ќе одговори на секој ирански напад врз стратешки цели на САД. Тој инсистира дека Америка не е вклучена во овој конфликт и нагласи дека е потребен договор по мирен пат кој нема да предизвика сериозни последици по целиот свет, а за ескалацијата на блискиот исток разговарал и со рускиот претседател Владимир Путин.
Војната помеѓу Иран и Израел сериозно рефлектира и врз светската економија. Американскиот долар ја достигна најниската вредност во однос на кошничката валути во последните три години.
Извор: 24vesti.mk
