Мицкоски чека одговор, Желјазков во офанзива – Бугарија го смени дипломатскиот терен од Брисел во Стразбург.
Премиерот Мицкоски изјави дека вчера и денеска е во комуникација со Европската Комисија и дека е одреден дури и предлог термин за средба меѓу Сиљановска и Желјазков на маргините на НАТО Самитот во Хаг. Сепак, последниот збор ќе го има Софија, за реализација на идејата на претседателот на ЕС Антонио Кошта.
Христијан Мицкоски премиер – Имаме комуникација со канцеларијата на Европската комисија и вчера и денес. Сè уште немаме повратен одговор. Има предлог термин, да почекаме да се изјаснат од бугарската страна.
И додека Македонија чека, Бугарија веќе е на друг терен. Желјазков одигра дипломатски потег во Советот на Европа. На средба со Теодорос Русопулос претседателот на Парламентарното собрание на Совет на Европа, побарал да се заштитат правата на бугарската заедница во земјава. На официјална страница на бугарската влада стои дека Желјазков порачал дека нема да се дозволи Советот на Европа да се користи , како што велат – за антибугарска кампања.
Влада на Република Бугарија – Премиерот Росен Жељазков, ја нагласи суштинската улога на ПССЕ во областа на правото, човековите права и демократскиот развој. Премиерот ја истакна важната улога што Советот на Европа треба да ја игра во заштитата на правата на бугарската заедница во Република Северна Македонија. Жељазков изрази уверување дека нема да се дозволи висок форум како што е ПССЕ да се користи за антибугарска кампања.
Вчера шефицата на држава Сиљановска изјави дека очекува европска креативност за деблокада на евроинтеграциите и дека е спремна да разговара на ниво претседател – премиер со Желјазков, на маргините на НАТО Самитот. Скопје сака разговори со Софија, но нема да отстапи од државните позиции, изјави шефот на дипломатијата Муцунски и порача дека ова му го пренел и на бугарскиот министер Георг Георгиев на телефонскиот разговор пред три дена.
Во меѓувреме Бугарија изгласа резолуција во парламентот, со која ги зацврсти позициите кон Скопје. Георг Георгиев и официјално му ја пренел одлуката на Муцунски, а истата и беше и врачена на македонската амбасадорка во Бугарија- Агнеса Руси.
Извор: 24vesti.mk
