Градоначалникот на Општина Чаир, Висар Ганиу, остро реагираше на изјавите и однесувањето на лидерот на Левица, Димитар Апасиев, кого го обвинува за говор на омраза кон Албанците и за директна соработка со градоначалничката на Град Скопје, Данела Арсовска и Блерим Беџети од ДУИ.
Во едно јавно соопштение, Ганиу нагласува дека триото Апасиев–Арсовска–Беџети го држат Скопје во заложништво и ја казнуваат Општина Чаир, каде што живее албанско мнозинство кое, според него, не прифаќа политичко потчинување, туку бара достоинство и еднаквост.
„Четири години без инвестиции. Нема паркови, нема улици, нема почит. Само ароганција и институционална дискриминација. Во меѓувреме, Градот Скопје има собрано над 18 милиони евра од даноците на граѓаните на Чаир и не вратило ништо за возврат“ истакнува Ганиу во својата изјава.
Тој додава дека ДУИ и Левица станале сојузници во молкот кон неправдите и во казнувањето на Албанците во Чаир.
„Јас ќе продолжам да зборувам. Да барам правда. Да се борам за моите сограѓани. А ти, Апасиев, остани во друштвото на Блерим Беџети и Данела Арсовска, совршено трио за заборав“ завршува Ганиу.
