Голден Стејт Вориорс ќе бидат без својата ѕвезда Стеф Кари за петтиот натпревар од плејофот против Минесота, откако тој сè уште не се опоравил од повредата што ја заработи во првиот натпревар.
Вориорс заостануваат со 3-1 од Минесота во полуфиналето на Западната конференција и се на добар пат да бидат елиминирани со уште еден пораз вечерва. Кари ги пропушти поразите во вториот, третиот и четвртиот натпревар од серијата.
По четвртиот дуел во понеделникот во Сан Франциско, Кари зборуваше за можноста да се врати за следниот меч: „Дури и да сакав да бидам Супермен, не би можел“.
Забелешката „Супермен“ се однесува на коментарот на Дрејмонд Грин од Голден Стејт по поразот од 110-117.
-Не, тој нема да биде Супермен за оваа работа. Ако може да игра, сигурен сум дека ќе игра. Но, не ни треба Кари да се обидува да биде Супермен, изјави Грин, запрашан за можното враќање на Кари во петтиот натпревар.
Кари, 11-кратен учесник на Ол-стар натпреварот, двократен MВП и четирикратен шампион на НБА, е лидер на сите времиња по бројот на постигнати тројки. Тој има 4.058 во својата кариера, речиси 900 повеќе од вториот на листата – Џејмс Харден.
Извор: kurir.mk
