На 9 мај во Чифте амам, објект на Националната галерија на Македонија, во 19 часот ќе се отвори изложбата „Црвен се барјак развева“, која ја обработува македонската народна борбена поезија и нејзината интерпретација во ликовните дела на македонските уметници. Автор на изложбата е проф. д-р Кирил Пенушлиски, историчар на уметност. На отворањето на изложбата ќе има и промоција на книга.
„’Црвен се барјак развева’“ има за цел да го истакне богатото културно наследство на Македонија и да ни ја доближи традицијата преку современи уметнички изрази, создавајќи простор за контекстуализација на историјата и значењето на народната борбена лирика во нашата колективна свест“, вели Пенушлиски.
На изложбата, покрај текстовите на македонските народни борбени песни ќе бидат преставени ликовни дела на некои од најголемите македонски уметници, како Никола Мартиноски, Лазар Личеноски, Томо Владимирски, Петар Мазев, Петар Хаџи Бошков, Борко Лазески, Васко Ташковски и други.
Покрај ликовните дела, во Чифте амам ќе бидат изложени и документи од непроценлива важност за историјата на македонскиот народ и држава, фотографии, оружје, некои од првите збирки на македонските борбени песни, како и оригинални црвени барјаци на македонската народно-ослободителна војска.
Изложбата е поддржана од Министерството за култура и туризам, како и од многу национални институции, меѓу кои се и Националната галерија, Музејот на современата уметност, Музејот на Македонија, Националната и универзитетска библиотека „Св. Климент Охридски“, Градската библиотека „Браќа Миладиновци“, како и музеи од други градови на Македонија вклучувајќи ги и тие во Охрид, Битола, Кичево, Неготино, Штип, Куманово и Прилеп.
ИЗВОР: sdk.mk
