Лидерот на германската Христијанско-демократската унија Фридрих Мерц не успеа да го обезбеди парламентарното мнозинство потребно за да стане канцелар, нанесувајќи и неочекуван удар на неговата нова коалиција со социјалдемократите.
Долниот дом на парламентот, Бундестагот, сега има 14 дена да го избере Мерц или друг кандидат за канцелар со апсолутно мнозинство. Сепак, засега нема друг кандидат освен Мерц. Фридрих Мерц, кој го предводеше конзервативниот блок ЦДУ/ЦСУ до победата на федералните избори во февруари и оттогаш обезбеди коалициски договор со централно-левичарската Социјалдемократска партија, освои само 310 гласа во долниот дом на парламентот.
Против изборот на Мерц имаше 307 гласа, а три воздржани. Нему му беа потребни 316 гласови за да обезбеди мнозинство. Со оглед на тоа што коалицискиот договор беше потпишан во понеделникот, се претпоставува дека некои пратеници биле воздржани или не гласале. Десничарската партија Алтернатива за Германија го поздрави неуспехот на конзервативниот лидер Мерц да биде избран за следен канцелар на земјата.
„Тој ја плати цената за сите негови сплетки во пресрет на изборите, за досега невидената монструозна изборна измама.“ – Алис Вајдел АФД.
Конзервативниот политичар Јохан Вадефул, кој треба да стане следниот министер за надворешни работи на Германија, застана во одбрана на партискиот лидер кој не успеа да биде избран за канцелар во првиот круг гласање.
„На крајот, изборот, кој се одржа со тајно гласање, беше одлука заснована на совест, која за жал излезе како што излезе.“ – Јохан Вадефул ЦДУ.
Никогаш досега не се случило кандидат за канцелар, по успешни коалициски преговори, да не биде избран во првиот круг на гласање. Во понеделникот, лидерите на Социјалдемократската партија на Германија (СДП) и конзервативниот блок на Христијанско-демократската унија и Христијанско-социјалната унија (ЦДУ/ЦСУ) потпишаа договор за коалиција, десет недели по предвремените избори за Бундестагот, со што се отвори патот за избор на Мерц за канцелар.
Ова следува откако во ноември минатата година пропадна трипартитната коалиција на канцеларот во заминување, Олаф Шолц. Германскиот коалициски договор предвидува планови за заживување на економијата, како што се намалување на даноците на корпорациите и намалување на цените на енергијата. Исто така, коалицијата ветува силна поддршка за Украина и поголеми средства за армијата. Берзите во Германија бележат пад откако Мерц не беше избран за канцелар.
Извор: 24vesti.mk
