Не стивнуваат политичките бранувања по најавите за самостојни настапи на Таравари во одредени општини на локалните избори но и создавањето заедничко претседателство на ВЛЕН од неговите доскорешни колициски партнери.
Според аналитичарот Благојче Атанасовски случувањата во албанскиот блок ќе бидат лакмус тест дали ќе има политичка мини реконструкција во Владата на Мицкоски со Таравари како помал етнички партнер или ќе му биде покажана излезната врата од Илинденденска 2.
Според Атанасовски, Таравари кој јавно не исклучи соработка со други партии во вториот круг, меѓу кои и со ДУИ за да соработува и да добие поддршка од Европскиот фронт важен е и ставот на Зијадин Села, претседател на другото крило на Алијанса за Албанците, кое е дел од фронтот и негов опонент.
Од ДУИ реагираа на изјавата на претседателката Гордана Сиљановска Давкова, според која нема потреба од предвремени избори ако Владата има 61 пратеник, дури и доколку албански пратеници ја напуштат коалицијата. Интегративците ја обвинија дека станала „гласноговорничка на едноетничката доминација“, а не чувар на соживот и консензус.
– Во време кога мултиетничкиот карактер на Македонија е под сериозна закана, претседателката Гордана Сиљановска Давкова отворено се позиционираше на страната на Владата, занемарувајќи ги механизмите за заштита од етничка мајоризација. Претседателката испраќа јасна порака дека етничкиот баланс и чувствителноста на коалициските партнерства не се дел од нејзиниот политички приоритет. – ДУИ.
Владејачката ВМРО-ДПМНЕ ја отфрла идејата за двојни избори наесен. Пратеникот Бојан Стојановски за 24 анализа рече дека локалните избори ќе покажат дали граѓаните сакаат предвремени парламентарни избори.
Извор: 24vesti.mk
