Илјадници луѓе протестираа во Атина во четвртокот за да го одбележат празникот на трудот 1 мај, пренесуваат медиумит, додека градскиот и поморскиот сообраќај беа нарушени поради штрајкот.
Фериботите што ја поврзуваат копнена Грција со островите во Егејското и Јонското Море останаа вкотвени во четврток, додека метрото, автобусите и тролејбусите во Атина доживеаја прекини.
Генералната конфедерација на приватни службеници, GSЕЕ, во соопштението повика на „активни политики против високите трошоци за живот и кризата со домувањето“, додека многу Грци добиваат ниски плати.
Синдикатот RAME, близок до Комунистичката партија, исто така, вети дека ќе ја интензивира „борбата за зголемување на платите, колективни договори, јавни услуги и училишта и болници што се во согласност со научниот напредок“, меѓу другото.
Во Солун, вториот по големина град во земјата, се собраа околу 7.000 луѓе, според локалната полиција.
Поворката носеше транспаренти како „Нека плаќаат богатите, нека победи народот“ и „Нивниот профит или нашите животи“.
„Бараме зголемување на платите за да можеме да живееме, колективни договори што ќе нè заштитат, работни места и живот со права“, рече за AFP претставникот на синдикатот Харис Кипријанидис.
Синдикатите ги критикуваат ниските плати во земјата каде што, и покрај повторното зголемување на растот, социјалните нееднаквости се сè поочигледни.
Минималната плата во Грција беше зголемена на 1 април за 6,02 проценти на 880 евра бруто (743 евра нето).
Извор: kurir.mk
