Администрацијата на американскиот претседател Доналд Трамп одлучи да го намали влијанието на царините врз автомобилската индустрија, олеснувајќи дел од давачките за странски автомобилски делови што се користат во домашното производство и спречувајќи двојно оданочување на веќе постоечките царини за увезени автомобили.
– Претседателот Трамп гради силно партнерство и со домашните производители и со американските работници, изјави американскиот министер за трговија Хауард Латник. Ова е голема победа за неговата трговска политика, наградувајќи ги компаниите што произведуваат во САД и создавајќи услови за инвестиции и проширување на производството, додаде тој.
Претходната недела претставници на американската автомобилска индустрија го повикаа Трамп да не воведува 25-процентни царини за увезените делови, предупредувајќи дека таквиот потег ќе ги зголеми цените и ќе ги намали продажбите.
„Повеќето добавувачи немаат капацитет да одговорат на нагло прекинување на снабдувањето. Многумина веќе се соочуваат со тешкотии, а царините би довеле до затворање на погони, отпуштања и стечај“, се вели во отвореното писмо на претставниците на автомобилската индустрија до властите. „Пропаѓањето на еден снабдувач може да ја сопре целата производна линија“.
Извор: 24vesti.mk
