Мнозинството од граѓаните се изјасниле за промени во клучните правосудни институции. Околу половина од испитаниците (50,3%) сметаат дека е неопходна промена на составот на Судскиот совет, додека 45,7% се изјасниле дека треба да се смени јавниот обвинител.
Ова се дел од резултатите на истражувањето на јавното мислење во Македонија на МКД.мк, кое го спроведе агенцијата Маркет вижн.
Негативен одговор на овие прашања дале околу 20% од анкетираните, што укажува на значителна поддршка за реформи во правосудниот систем.
На анкетата со реакција се јавија од СДСМ. Од таму велат дека со 400 илјади евра тендер се платени „манипулациите на Маркет Вижн“.
„Омилената агенција на ВМРО-ДПМНЕ која уште од времето на Груевские платена да ги манипулира граѓаните со лажни анкети е повторно ангажирана, овој пат за сума од 400.000 евра народни пари. Имено, Маркет вижн пред само неколку недели склучила договор со Владата на рекордна сума од 400.000 евра за да прави анкети и го мери мислењето и задоволството на граѓаните од работата на Владата. Зар некој треба да верува во овие анкети кои служат единствено за да се манипулира јавноста и се во функција на пропагандата на ДПМНЕ. За жал се враќа старата пракса на постојано пласирање на манипулативни анкети кои треба да ги демотивираат граѓаните да бараат промени, но оваа стратегија од времето на Груевски е одамна прочитана“, велат од СДСМ.
Истражувањето е спроведено од 20 март до 17 април, преку CATI метод (телефонско анкетирање со помош на компјутер), врз репрезентативен примерок од 1.200 испитаници. Статистичката грешка на истражувањето е ±3%, со интервал на доверба од 95%. Примерокот е усогласен според регионална припадност, пол, возраст и етничка структура, согласно податоците од пописот на резидентното население во 2021 година.
ИЗВОР: ТВ 21
