Претседателката на Државната комисија за спречување на корупцијата (ДКСК), Татјана Димитровска, е во центарот на јавниот интерес поради истрагата за случајот „Адитив“, во кој е осомничена за оддавање службена тајна. Истрагата се проширува, а јавноста поставува прашања за нејзината одговорност и легитимитетот на нејзината функција.
Според Обвинителството за гонење организиран криминал и корупција, Димитровска е осомничена дека му оддавала информации од предмети на поранешниот директор на ТЕЦ Неготино, Небојша Стојановиќ, кој исто така е осомничен во истиот случај. Доказите се добиени преку вештачење на неговиот мобилен телефон, каде се пронајдени пораки разменети преку апликациите „Ватсап“ и „Вибер“. Поради сериозноста на сомневањата, судот ѝ изрече мерки за претпазливост, вклучувајќи забрана за контакт со предмети, пошта и друга документација поврзана со работењето на ДКСК, како и забрана за гласање и распределување предмети.
Димитровска е единствената членка на ДКСК која поседува дипломатски пасош, доделен од Министерството за надворешни работи (МНР). Таа изјави дека дипломатскиот пасош не е привилегија, туку право кое служи за извршување на службените должности, особено при учество на меѓународни настани. Сепак, останатите шест членови на Комисијата, иако поднеле барања, сè уште не добиле одговор од МНР .
Министерот за надворешни работи, Тимчо Муцунски, изјави дека поседувањето дипломатски пасош не носи имунитет и дека е логично, од етички и морални причини, Димитровска да поднесе оставка. Тој нагласи дека дипломатскиот пасош не влијае на правната постапка и дека МНР ќе го одземе пасошот кога ќе престане функцијата на носителот.
-Самиот дипломатски пасош на наш граѓанин не значи дека тој ужива било какви права поврзани со некоја форма на имунитет. Што значи дека истиот не може да влијае на самата постапка која се спроведува од нашите органи и во моментот кога ќе престане функцијата на таа поединечна личност, секако МНР ќе го одземе тој дипломатски пасош. Логично е кога сте опфатени со ваков тип на постапка, почитувајќи ја и презумпцијата на невиност, ова го велам пред се како човек, не како министер, логично е дадете оставка. Тоа не треба, според мене, да влијае на кредибилитетот на сите останати членови на таа комисија, рече Муцунски.
Случајот со Димитровска ја отвора дебатата за одговорноста на носителите на јавни функции и потребата од транспарентност и интегритет во институциите. Додека истрагата продолжува, јавноста очекува јасни одговори и соодветни мерки за заштита на довербата во институциите за борба против корупцијата.
ИЗВОР: racin.mk
