ИСТАНБУЛ (АА) – Администрацијата на американскиот претседател Доналд Трамп побара одобрение од Врховниот суд за спроведување на забраната за служење на трансродовите лица во војската, пренесува Анадолу.
Генералниот обвинител Џон Сауер поднесе итна петиција до судот, со која се бара поништување на националната судска наредба издадена од федерален судија во државата Вашингтон, пренесе Ен-би-си њуз.
Сауер тврди дека таа судска наредба е во спротивност со „значителната дискреција“ што обично се доделува на професионалните процени на војската.
Противниците на забраната тврдат дека таа е противуставна и ги прекршува одредбите од 14. амандман, со кој се гарантира еднаква заштита под закон.
Новата забрана претставува проширување на политиката што Трамп ја воведе во својот прв мандат, политика што Врховниот суд тогаш дозволи да стапи на сила. Поранешниот претседател Џо Бајден подоцна ја укина оваа забрана.
Сауер објасни дека политиката исклучува лица што имаат „родова дисфорија или се подложиле на медицински интервенции за родова дисфорија“.
Окружниот судија Бенџамин Сетл на крајот на март пресуди дека „аргументите на Владата не се убедливи посочувајќи на недостиг на нови докази за новата политика. Апелациониот суд на 9. округ одби да ја блокира неговата одлука.
Администрацијата се повикува на претходната одлука на Пентагон од времето на првата администрација на Трамп, според која лицата со родова дисфорија претставуваат „закана за ефикасноста и борбената способност на војската“.
Во меѓувреме, одделен судски процес за ова прашање се води и во Вашингтон, каде што администрацијата на Трамп се обидува да добие слична наредба.
Врховниот суд им даде рок на противниците на забраната да одговорат до 1 мај. Дотогаш забраната останува блокирана.
Извор: Anadolu Agency (AA)
