Директорот на Меѓународниот филмски фестивал „Киненова“, Небојша Јовановиќ, во интервју за МИА, говорејќи за претстојното десетто јубилејно издание на фестивалот, вели дека веќе имаат потврда за учество на голема светска филмска ѕвезда. Споделува дека годинава главните случувања на „Киненова“ ќе се одвиваат во Скопје и во Охрид, а голем број други градови ќе имаат можност директно да ја следат програмата.
– Драго ми е што дојдовме до ова десетто издание. Ова е голем јубилеј за нас, бидејќи се работи за независен проект, кој што успеа да се позиционира силно и добро, не само на македонската сцена на фестивали, туку во регионот, но и во Европа. Фестивалот е препознаен, за што говори и поддршката од меѓународните фондови и институции, странските амбасади во нашата земја, големиот број на пријавени филмови од целиот свет, но и големото присуство на значајни европски и светски имиња на нашиот фестивал, вели Јовановиќ.
Тој во интервјуто потсетува дека самиот фестивал почна со гостување на големата, за жал веќе почината Мира Фурлан, која всушност беше и првиот лауреат, а потоа со текот на годините гостуваа многу познати светски ѕвезди.
– Десеттото издание на „Киненова“ ќе биде наша гордост. Веќе имаме потврда од една голема европска, светска филмска ѕвезда, дива, и она што ми претставува големо задоволство, е што фестивалот го поместуваме. Ќе се случува во Скопје, меѓутоа и низ цела Македонија. Голем број на градови ќе имаат можност директно да ја следат програма на „Киненова“, но главните случувања ќе се одвиваат во Охрид и Скопје, вели Јовановиќ.
Додава дека имаат значајна поддршка од градоначалникот на Охрид за организирање на настаните.
– На некој начин го подаруваме фестивалот не само на Скопје, туку и на градот Охрид, за што веќе имаме значајна поддршка од градот. Особено сум благодарен што градоначалникот на Охрид го препозна настанот, вели Јовановиќ.
Најавува дека програмата ќе изобилува со голем број филмови во различни програми, вклучувајќи ги и најзначајните регионални, како и филмови од екс-југословенските простори.
Инаку, од 30 март до 3 април во Домот на културата „Билјана Беличанец“ во Кисела Вода се одржа ревија на филмови од Меѓународниот филмски фестивал „Киненова“. Самата програма беше посветена на настраданите од трагичниот настан во Кочани, поточно целокупниот приход од влезниците на овој настан беше наменет за овие семејства.
„Киненова“, како што најавува Јовановиќ, ќе продолжи и во следниот период со организирање на вакви ревии.
ИЗВОР: racin.mk
