Рубио: САД остануваат во НАТО, но Алијансата мора да биде посилна

САД остануваат во НАТО, Трамп не е против НАТО, порача американскиот државен секретар Марко Рубио, од седиштето на Воената Алијанса во Брисел.

На стартот на дводневниот состанок на министрите за надворешни работи, Рубио порача дека САД се активни во НАТО, а како што кажа-  хистеријата во медиумите, вклучително и во САД, е неоправдана. Рубио, порача дека очекува да го напушти Брисел со јасна определба од сојузниците да потрошат 5 отсто од својот БДП за одбрана – што е зголемување од сегашните 2 отсто, кои некои европски земји се уште не ги исполнуваат.  

– Трамп не е против НАТО, туку е против НАТО, кој ги нема неопходните капацитети за целосно да ги исполни обврските кои Договорот ги наметнува на секоја земја- членка. Никој не очекува да бидете способни да го направите за година или две, но патеката мора да биде реална. Тоа е суровата вистина и мора да се каже сега. – Марко Рубио државен секретар на САД.

Генералниот секретар Марк Руте, порача дека европските членки на Алијансата се обврзаа на најголемото зголемување на трошоците за одбрана од крајот на Студената војна, но се согласи и со САД, дека мора да се направи повеќе. Пред стартот на состанокот, Руте испрати порака дека Алијансата работи и на безбедноста на Западен Балкан. 

– Јас бев во Сараево, во Приштина, неодамна дискутирав на телефон и тука во Брисел со српскиот претседател Вучиќ. Ние навистина сме ангажирани како НАТО, да се осигуриме дека Западен Балкан ќе остане стабилен и безбеден. Заедно со нашите 5 сојузници – Црна Гора, Северна Македонија, Словенија, Хрватска и Албанија, колективно го управуваме Западен Балкан за да остане безбеден. – Марк Руте генерален секретар на НАТО.

На прашање до генералниот секретар – зошто на дводневниот состанок во Брисел, не е ставено и прашањето околу американските закани кон Гренланд, Руте изјави дека за островот би можело да се говори во една поширока дебата.

И додека министрите на 32 членки, два дена ќе дебатираат зад затворени врати, Бриселски Политико, оцени дека иако има насмевки пред камерите, зад сцената се подготвува бура.