АНКАРА (АА) – Израелскиот премиер Бенјамин Нетанјаху денес изјави дека ќе ги заштити Европа и нејзините сојузници од Блискиот Исток од, како што рече, „иранската оска на злото“, јавува Анадолу.
„Ќе ја уништиме иранската оска на злото која им се заканува на Израел, Европа и нашите партнери на Блискиот Исток“, рече Нетанјаху на заедничката прес-конференција во Будимпешта со неговиот унгарски колега Виктор Орбан.
„Ние сме посветени на уништување на иранската оска и заштита на Израел и Европа од неа“, додаде тој.
Нетанјаху рано утрово пристигна во Унгарија во четиридневна посета, и покрај налогот за негово апсење издаден од Меѓународниот кривичен суд (МКС) за воени злосторства и злосторства против човештвото во Појасот Газа.
Израелскиот премиер ја поздрави одлуката на Унгарија за напуштање на МКС, нарекувајќи го потегот „храбра одлука“. Тој го оквалификува судот со седиште во Хаг како „корумпирана и антисемитска организација“.
Нетанјаху, исто така, вети дека ќе ги зголеми одбранбените врски и соработката со Унгарија.
Посетата на Нетанјаху на Унгарија е прво негово стапнување на европско тло откако МКС издаде налози за негово апсење и на поранешниот министер за одбрана, Јоав Галант, во ноември минатата година.
Групите за човекови права, вклучително и „Амнести интернешнал“ и „Хјуман рајтс воч“, ја повикаа Унгарија да го уапси Нетанјаху и да го предаде на МКС.
Извор: Anadolu Agency (AA)
