Универзитетскиот професор, Злате Димовски смета дека истрагата за трагичниот настан во Кочани се одвива професионално и дека иако станува збор за услови на пожар на масовна деструкција, сите до сега преземени мерки од надлежните институции се добро координирани и испланирани.
Во своето гостување во централниот Дневник на Македонската радио-телевизија истакна дека тоа што треба да се направи во вакви случаи, впрочем што и надлежните институции направиле, е да се делува фронтно што побрзо и да се организираат сите чинители, сите оние коишто треба да ги разјаснат сите оние околности коишто постојат.
„Во услови на масовна деструкција, како што е сега ова, сметам дека се она што се презема е координирано и добро испланирано. Факт е дека ваквите настани не можат да се предвидат, факт е дека веднаш треба да се делува фронтно што побрзо и да се организираат сите чинители, сите оние коишто треба да ги разјаснат сите оние околности коишто постојат. Да се увиди прво се она што може да се стори на самото лице место, да се обезбеди самото лице место максимално за да не дојде евентуална контаминација на трагите, да се помогне пред сè на жртвите. Понатаму, да се пронајде се она што е трага, се она што може да послужи како доказ, сето тоа да се подигне, да се разговара со многу луѓе“, вели професор Димовски.
Запрашан, дали Министерството за внатрешни работи одговорило соодветно на задачата, со оглед на тоа што проценка на целата ситуација и најголемиот товар падна на министерството, професорот Димовски вели дека МВР апсолутно одговорило на сите предизвици, брзо одреагирало и организирано се постави на висина на задачата.
„Апсолутно, МВР е она коешто и претходно преземало одредени чекори. Зборувам, од она што имаме и сознанија. Еве имаме и загинат полицаец многу малку му се придаде важност на сето тоа, а требаше навистина. Затоа што тој загина на должност, си ги обавуваше оние обврски кои нему му беа дадени како задача таа вечер. Министерството многу брзо одреагирало, согласно сознанијата, не сум бил на лице место. Пред сè и над се помогнало да се санираат состојбите, потоа го обезбедило соодветно објектот за да може покасно, евентуално, да се пристапи кон утврдување на се она што би можело да се пронајде како трага, коешто утре дефинитивно ќе значи дека нешто таму се случувало. Или колку поблиску ние ќе ја доведеме таа позиција до материјалната вистина, едноставно ни требаат многу факти и докази во тој дел“, истакна Димовски.
ИЗВОР: kurir.mk
